يسري فودة بيقرأ من شاشة !
دائمًا ما يتميز يسري فودة بالدخلات - المقدمات - التاريخية لبرنامجه .
وتفتح اليوتيوب تلاقي العنوان مكتوب " مقدمة تاريخية ليسري فودة "
وبصراحة هي حاجه مبهرة ومبهجة للنظر لما تشوف يسري فودة بيرص كلمات زي الرصاص ولا كأنه بيرص حجر شيشة .
والناس كانت بتفتكر انه بيرتجل . أو على أقل تقدير حافظ الكلام . ومع ذلك مبيغلطش في أي كلمة و بيكون مركز جدًا مع الكاميرا . زي مثلا بتوع نشرة الاخبار تلاقيه ممكن يتكلم لمدة أكثر من دقيقة ويقرأ لك الخبر بتفاصيله وهو باصص للكاميرا .. وكنت بستغرب جدًا وأنا صغنن وبقول معقول قبل كل نشرة أخبار بيحفظوا الكلمات دي ؟ ولا في واحد واقف وماسك لوحة كبيرة بيقروا من عليها ؟
الموضوع ببساطة ان في شاشة اسمها " Teleprompter " أو الإسم الدارك " أوتو كيو " دي عبارة عن " شاشة شفافة " بتتحط على الكاميرا وبيظهر عليها الكلام اللي انت عايز تقوله . وممكن تقعد تقرأ منها طول الحلقة . عادي جدًا . ونظرك بيكون متوجه للكاميرا .. وشكلها زي ما انتوا شايفينه في الصورة كده
وبغلطة من المصور في حلقة يسري فودة الاخيرة كشف شاشة الـ " Teleprompter " اللي كان يسري فودة بيقرأ منها . هتلاقيها في الثانية 22 . ركز في الكلام اللي ع الشاشة وركز في الكلام اللي هو بيقوله .
[ندعوك للتسجيل في المنتدى أو التعريف بنفسك لمعاينة هذا الرابط]ولو الموضوع عملك انجذاب زي نوال . تقدر تشوف الفيديو الصغنن ده هيعرفك ازاي شاشة " Teleprompter " بتشتغل .
[ندعوك للتسجيل في المنتدى أو التعريف بنفسك لمعاينة هذا الرابط]ودي بيستخدمها بعضهم في الاملاءات . يعني لما يكون الباشا مظبلك جملتين تطلع تبُخهم على الهوا و تروح تنام في سريرك .
ملحوظة:
انا مش معترض على استخدامها في نشرات الاخبار او استخدامها حتى في برامج التوك شو . و معنديش اي مشكلة في أي وسيلة عشان تحسن عرض البرنامج .. لكن حبيت أوضح لكم عشان متبقوش منبهرين وتعرفوا ان معظم الكلام اللي بيتقال بيبقى مكتوب ع الشاشة .. شكرًا .. حول .
[ندعوك للتسجيل في المنتدى أو التعريف بنفسك لمعاينة هذا الرابط]
الجمعة ديسمبر 06, 2013 3:48 am
